أكد ياسر طه والد الطفل رشيد المصاب بمرض نادر، عبر حسابه على موقع التواصل الاجتماعي فيس بوك على نجاح حملة التبرعات التي أطلقها قبل أيام عبر السوشيال ميديا لجمع مبلغ مالي قيمته 35 مليون جنيه لعلاج ابنه.
وتابع والد الطفل :«لما رشيد اتشخص بمرض الSMA وعرفنا ثمن الحقنة اللي محتاجها، سلمنا أمرنا لله ودعينا ربنا يقوينا على الاختبار ده.. متخيلناش أبداً إننا هنوصل للحظة دي وإن حكمة ربنا تكون إن رشيد يخلق الحالة دي من التكافل الإجتماعي والحب والخير والأهم إن الناس تتعرف على المرض ده ويبقى في أمل لأطفالنا إنهم يتعالجوا بفضلكم».
وأضاف : «شكرا لكل اللي دعم رشيد.. لأن رشيد بسببكم هياخد الحقنة وان شاء الله أطفال كتير من بعده! دعواتكم نبدأ رحلة العلاج الأسبوع دة وتفضلوا معانا خطوة بخطوة لحد ما نتطمن عليه.. وشكر خاص لـEFG Hermes، المؤسسة الوحيدة اللي اتبرعت لرشيد وبقيمة ضخمة كمان (2,5 مليون جم). أنقذتونا على أخر لحظة وخلتونا متستناش وقت أطول وأخيرا شكر واجب لعدد اللي حرصوا على ان التبرعات تتم بأسهل طريقة ممكنة وكانوا بيشتغلوا بكل حب وحماس لدعم رشيد».
ونوه والد الطفل إلى وجود حالات أخرى لنفس المرض جاري التبرع لها قائلا : «حابين نستغل الفرصة دي ونوصي نفسنا أولا ونوصيكم، نبذل نفس المجهود وأكتر لليال وآسر ثقتنا فيكم إننا نقدر في نفس الفترة، وأقل كمان، نجمع نفس المبلغ لكل واحد فيهم عشان ياخدوا الحقنة ومن بعدها إن شاء الله باقي الأطفال مصطفى وهاندا وغيرهم».
اقرأ أيضًَا:«ملاك بريء» أحزن المصريين.. رشيد مصاب بمرض نادر وعلاجه باهظ الثمن
بداية القصة
وبدأت قصة الطفل رشيد، حين كتبت والدته هدى عبر حسابها على فيس بوك، إصابته بمرض جيني نادر يحمل اسم ضمور العضلات الشوكي، وقالت في رسالتها: «رشيد ابني تم تشخيصه مؤخرا بمرض جيني نادر اسمه ضمور العضلات الشوكي Spinal Muscular Atrophy-معروف بالSMA نسبة انتشاره 1:10000 في الأطفال».
وتابعت: «المرض ده بيأثر على الخلايا المسؤولة عن الحركة وبيضعف الأطراف فإبني مش هيقدر يقف ولا يمشي، ده بالإضافة اننا لازم نحافظ على جلسات علاج طبيعي يوميا ومدى الحياة للحفاظ على الحالة من التدهور. الحل الوحيد هو حقنة اسمها Zolgensma بس للأسف الحقنة دي هي الأغلى في العالم تكلفتها 2.1 مليون دولار (حوالي 35 مليون جنيه مصري) ومن أهم شروطها ان الطفل ياخدها قبل ما يتم سنتين».
اقرأ أيضًا:أماكن مراكز تلقي لقاح كورونا للمسافرين للعمل بالخارج
وأكدت في حديثها: «الحقنة دي متوفرة في الولايات المتحدة ومؤخرا أصبحت متوفرة في دبي. وطبعا نظرا لسعرها، فمحدش بيقدر على تكلفتها من غير تبرعات.. فأنا بناشد السيد الرئيس إنه يعالج ابني على نفقة الدولة مع العلم إن الوقت المتاح قدامنا هو أقل من 4 شهور!»، واختمت رسالتها:«من فضلكم فعلوا الهاشتاج وساعدونا نوصل صوتنا للمسؤولين».
