طالب يستغيث بوزير التعليم بعد حصوله على «صفر» في العربي.. والوزارة تحقق

استغاث الطالب يوسف محسن، طالب في الصف الثالث الثانوي، بالدكتور طارق شوقي وزير التربية والتعليم والتعليم الفني، بعد إعلان نتيجة الثانوية العامة، لحصوله على «صفر» في العربي، رغم ارتفاع مجموعه  في باقي المواد.

منشور فيسبوك

وبث الطالب شكوته إلى وزير التربية والتعليم عن طريق منشور بثه عبر حسابه على فيسبوك، قائلا: أنا اسمي يوسف محسن من مدرسة جمال عبدالناصر غرب الفيوم جبت 64% وجبت في العربي صفر وحصل معايا أن كنت مسلم ورقتين للبابل شيت وعامل محضر بده زي ما المدرس قالي أنا قولت للمراقبة أنا غلطت في سؤال أعمل ايه ادتني بابل شيت قالتلي حل فيه السؤال ده بس وهندبس الاتنين في بعض ومعاهم المحضر.

وأضاف الطالب في منشوره : المحضر مكنش بتبديل بابل شيت لا أنا كنت كاتب إن عندي سؤالين غلط وتم نقلهم في بابل شيت آخر على حسب تعليمات المدرس بالكلام اللي هكتبه أنا معرفش إزاي أكتب محضر أنا كتبت اللي قاله.. ولما سألت دلوقتي كذا مدرس قالوا بيروح ورقة واحدة والتانية بتتبعت كتالف ومدرسين قالوا بتتقطع بس وده مش اللي مضيت عليه ولا كتبته في المحضر، والمحضر اتعمل ومضيت على أساس اللي المستر بتاع اللجنة قالي عليه واللي أنا كاتبه بايدي في المحضر.

محضر إثبات حاله

وتابع الطالب: وكتبت المحضر إني نقلت إجابه السؤال ده ف بابل شيت تاني ومضيت عليه والمراقب كنت قولتله طيب ينفع يبقي ليا اتنين قالي طالما معمول محضر إثبات حاله خلاص وكان في آخر الوقت وقالي يلا عشان الوقت خلص وأنا كنت أول مرة في حياتي امتحن بابل شيت ولسه معرفش أي حاجه ف مشيت ورا كلام المدرس اللي هو أكيد فاهم أكتر مني ودلوقتي لقيت إني جايب صفر في العربي، فمعنى كده إن الورقة اللي هي فيها سؤال واحد اللي راحت واتصححت ومع العلم المدرس قالي هيروح الاتنين طالما عملت محضر.
واختتم الطالب حديثه : هل ذنبي إني مشيت ورا كلام المراقب اللي أصلا مخلانيش انقل غير سؤالين بس ولو سابني أنا كنت هنقل كله بس المراقب والمراقبة كانوا واقفين جنبي عايزين يلموا الورقة وخلاص.

ومن ناحية أخرى قالت مصادر بديوان عام وزارة التربية والتعليم والتعليم الفني، إن الوزارة تتابع ما نشر على مواقع السوشيال ميديا وسيتم التحقيق فيما قاله الطالب، حول حصوله على صفر في العربي، وإذا كان له حق سوف يحصل عليه.